मितिः २०७८/०७/०८

माननीय मुख्यमन्त्री कुल प्रसाद केसीज्यूद्वारा संवोधन तथा निर्देशन

माननीय मन्त्रीज्यूहरु, राज्य मन्त्रीज्यूहरु, प्रमुख सचिवज्यू, सचिवज्यूहरु।

  • नवनियुक्त सम्पूर्ण मन्त्रीज्यूहरु तथा राज्यमन्त्रीज्यूहरुलाई सर्वप्रथम बधाई ज्ञापन गर्दछु ।तपाईहरुको कार्यकालको पूर्ण सफलताको कामना गर्दछु ।लुम्बिनी प्रदेशमा मेरो नेतृत्वमा संयुक्त (गठबन्धन) सरकार बनिसकेपछि सरकारले पूर्णता पाओस् र नतिजामूलक कार्य सम्पादनतर्फ अघि बढोस् भन्ने प्रदेशवासीको चाहना मन्त्रीमण्डलले पूर्णता पाएसँगै पूरा भएको छ । तपाई हाम्रो काँधमा समृद्ध लुम्बिनीः आत्मनिर्भर प्रदेशनिर्माणको गहन अभिभारा र जिम्मेवारी आएको छ ।मन्त्रीपरिषद् जनताप्रति र मन्त्रीज्यूहरु मुख्य मन्त्रीप्रति उत्तरदायी हुने लोकतान्त्रिक परम्परा अनुरुप हामी अघि बढ्ने छौं ।तपाई हाम्रो सोंच, आचरण, व्यवहार, कार्यशैली, प्रवृत्ति र कार्य सम्पादन संस्कृति सहित हाम्रा समग्र कार्य र क्रियाकलाप प्रदेशवासी आम नागरिक, सञ्चार जगत तथा सामाजिक सञ्जाल समेतको निगरानीमा रहने हुनाले त्यसतर्फ सचेत रहन म सबै मन्त्रीज्यूहरु र राज्यमन्त्रीज्यूहरुलाई अनुरोध गर्दछु ।

 

  • मेरो नेतृत्वमा सरकार गठन भएदेखि नै आपसी संवाद, सहमति र सहकार्यमार्फत गठबन्धन संस्कृतिको विकास गर्दै लोकतान्त्रिक मूल्य मान्यता अनुरुप प्रदेशको समग्र शासन व्यवस्थाको सञ्चालन, विकासको व्यवस्थापन एवम् सार्वजनिक सेवा वितरणमा सुधारात्मक कार्य प्रणाली/पद्धतिको शुरुवात/अबलम्वन गरिएको सबैमा विदितै छ ।

 

  • लोक कल्याणकारी सरकारको अवधारणा अनुरुप शोषणरहित, समतामूलक र सामाजिक न्याय सहितको समाज निर्माण एवम् विकासका लागि समानुपातिक समावेशी र सहभागितामूलक सिद्धान्तका आधारमा उत्पादनमुखी, आत्मनिर्भर र समाजवादउन्मुख अर्थतन्त्रको निर्माण तथा उपभोगमुखी अर्थतन्त्रलाई उत्पादनमुखी अर्थतन्त्रमा रुपान्तरण गरी समृद्ध लुम्बिनी आत्मनिर्भर प्रदेशको अवधारणालाई मूर्त रुप दिन म माननीय मन्त्रीज्यूहरुको विशेष ध्यान आकृष्ट गराउन चाहन्छु ।
  • प्रदेशमा उपलब्ध जल, जमिन, जनशक्ति, मानवीय पूँजी लगायत अन्य स्रोत र साधनको अधिकतम परिचालन र उपयोग गर्दै सुशासन, विकास र समृद्धि मार्फत प्रदेशवासीको जीवनस्तरमा सकारात्मक परिवर्तन ल्याउन यहाँहरुको महत्वपूर्ण भूमिका रहनेछ ।दिगो र उच्च बृद्धिदरको आर्थिक विकास सहित समृद्ध र आत्मनिर्भर प्रदेश बनाउन यहाँहरु सबै प्रतिवद्ध र कटिबद्ध भएर लाग्नु नै हुनेछ।
  • प्रदेश सरकारका क्षेत्रगत नीति, आवधिक योजना, बजेट र वार्षिक कार्यक्रमले परिलक्षित गरे अनुसार प्राथमिकता निर्धारण गरी समयवद्ध ठोस कार्य योजना,  माईलस्टोन र सूचकहरु तयार गरी प्रभावकारी रुपमा समयमै गुणस्तरीय रुपमा कार्य सम्पादन गर्नुहुनेछ । नतिजामूलक कार्य सम्पादन सँस्कृतिको विकास गर्नुहुनेछ ।यहाँहरुको कुशल नेतृत्वले उपलब्ध सीमित स्रोत र साधनको अधिकतम परिचालनमा ध्यान दिने नै छ ।सार्वजनिक स्रोत र साधनको मितव्ययी र कूशलतापूर्वक उपयोग गर्नु हुनेछ ।मन्त्रालय तथा अन्तर्गतका कार्यालयहरुको व्यवस्थापनलाई चुस्त र दुरुस्त बनाउनुहुनेछ ।अन्तरमन्त्रालय समन्वयलाई थप प्रभावकारी बनाउनुहुनेछ ।आवश्यकता अनुसार कार्य सम्पादन सम्झौतासमेत गर्नुहुनेछ ।
  • प्रदेशका सम्भावना र सवल पक्षहरुको अधिकतम उपयोग र प्राथमिकीकरण गर्दै आर्थिक सामाजिक रुपान्तरण, गरिबी, बेरोजगारी र असमानताको अन्त्य गर्दै समृद्ध र आत्मनिर्भर प्रदेश निर्माणतर्फ जुट्नु हुनेछ
  • प्रदेश सभाबाट निर्णय भए अनुसार राजधानी व्यवस्थापन सम्बन्धी कार्यलाई संघीय सरकार तथा स्थानीय तहसँग निरन्तर समन्वय गरी जग्गा प्राप्ति लगायत अन्य कार्य तदारुकताकासाथ अघि बढाउनुहुनेछ ।राष्ट्रको गौरव र प्रदेशको पहिचान झल्किने गरी प्रदेश राजधानीको गुरुयोजना निर्माण कार्य सम्पन्न गरी सो को आधारमा सरकारी कार्यालय तथा आवास भवन र अन्य पूर्वाधारको विस्तृत परियोजना प्रतिवेदन तयार गरी निर्माण कार्यको थालनी गरी यथासंभव छिटो कार्य सम्पन्न गर्नुहुनेछ ।
  • कोभिड-१९ महामारीबाट प्रदेशवासीको जीवनरक्षा गर्ने विषय यो सरकारको उच्च प्राथमिकतामा रहेको हुँदा सोही अनुरुप कार्य सम्पादन गर्नुहुनेछ । खोप खरीद तथा व्यवस्थापनलाई थप प्रभावकारी बनाउनुहुनेछ ।तालिका बनाएर खोप अभियान सञ्चालन गरी समयमै खोप अभियान सम्पन्न गर्नु हुनेछ । कोभिड-१९ को तेस्रो लहर समेतलाई मध्यनजर गरी संक्रमण रोकथाम, नियन्त्रण र उपचारका लागि स्रोत साधन, पूर्वाधार, औषधि, स्वास्थ्य उपकरणहरु, अक्सिजन, भेन्टिलेटर, जनशक्ति व्यवस्थापन लगायत सम्पूर्ण व्यवस्थापन चुस्त दुरुस्त बनाउनु हुनेछ । प्रदेशका कुनै पनि नागरिकले अस्पतालमा बेड नपाएको, अक्सिजन नपाएको, औषधि उपकरण नपाएको तथा उपचारमा कमी रहेकोजस्ता गुनासाहरु आउनै नदिने गरी प्रभावकारी रुपमा कार्य सम्पादनको व्यवस्था मिलाउनु हुनेछ ।
  • लगानीबाट मात्र उत्पादन, रोजगारी र आय आर्जनको अवसर श्रृजना हुने तथ्यकाप्रति प्रदेश सरकार स्पष्ट छ । लगानी गर्ने र व्यवसाय गर्ने अनुकूल वातावरण निर्माण गरी निजी क्षेत्रलाई विश्वासमा लिएर अघि बढ्न सरकार दृढ छ ।
  • तदनुरुप तुलनात्मक लाभ र प्रतिस्पर्धात्मक क्षमताका क्षेत्रहरुको पहिचान गरी प्रदेशमा लगानी भित्र्याउनलगानीकर्ताहरुलाई आकर्षण गर्न नीतिगत, कानूनी र संस्थागत सुधार गर्नुहुनेछ । सार्वजनिक, निजीथा वैदेशिक लगानीलाई प्रोत्साहन गर्न लगानी सम्मेलनलाई सबै सरोकारवालाहरुको सक्रिय सहभागितामा भव्यतापूर्वक सम्पन्न गर्नुहुनेछ लुम्बिनी प्रदेशलाई लगानीको हवको रुपमा विकास गर्न तपाईहरुको अहं भूमिका रहनेछ । लगानी सम्मेलनमा सबै मन्त्रालयले आयोजना तथा लगानीकर्तालाई प्रदान गरिने सुविधा सम्बन्धमा प्रस्ताव तयार गर्नु हनेछ । प्रदेश योजना आयोग तथा आर्थिक मामिला तथा सहकारी मन्त्रालयसँग समन्वय गरी लगानी सम्मेलनलाई पूर्ण सफल बनाउनु हुनेछ ।
  • सार्वजनिक स्रोत र साधनको कुशलतापूर्वक सदुपयोग गर्नुहुनेछ ।आर्थिक अनुशासन, खर्चमा मितव्ययिता, भ्रष्टाचार नियन्त्रण र सुशासन प्रवर्द्धनमा विशेष जोड दिनु हुनेछ । भ्रष्टाचारप्रति शून्य सहनशीलताको नीति अवलम्बन गर्नु हुनेछ । पारदर्शीता, सुशासन र उत्तरदायित्वको भावनालाई मूर्तरुप दिन खर्च प्रणालीमा मितव्ययीता र पारदर्शीता कायम गर्नुहुनेछ ।
  • सहलगानीका आयोजनाहरु पहिचान गरी संघीय सरकारसँग थप बजेट माग गर्नु हुनेछ ।स्रोतको व्यवस्थापनमा विशेष ध्यान दिनुहुनेछ ।
  • पूँजीगत खर्चमा अभिबृद्धि र चालु खर्चमा मितव्ययीता कायम गरी सार्वजनिक खर्चलाई मितव्ययी तथा प्रभावकारी बनाउनुहुनेछ ।
  • आर्थिक वर्षको अन्त्यमा विशेष गरी असार मसान्तमा अत्याधिक पूँजीगत खर्च गर्ने परिपाटीको अन्त्य गर्नुहुनेछ । खर्च गर्ने क्षमता, मितव्ययीता, गुणस्तर तथा परिणाममुखी विकासमा ध्यान केन्द्रित गर्नुहुनेछ । प्रदेश सरकारबाट प्रदान गरिने अनुदानहरुलाई व्यवस्थित गर्न अनुगमन प्रणालीलाई प्रभावकारी बनाउनु हुनेछ ।
  • हाम्रो प्रदेशको विशिष्ट प्राकृतिक स्वरुप र भू-संरचनाको कारणले हुन सक्ने विपद् जोखिमको पहिचान र पूर्वानुमान गरी सो को रोकथाम र व्यवस्थापनलाई प्रभावकारी बनाई नागरिकको जीवनरक्षा गर्नुपर्नेछ ।संघ तथा स्थानिय तहको समन्वयमा बाढी, पहिरो, डुवान तथा आगजनीबाट विस्थापितहरुको पुनःस्थापना कार्यक्रम सञ्चालन गर्नुहुनेछ ।
  • सूचना प्रविधिको उच्चतम उपयोग गर्दै डिजिटल प्रदेशको अवधारणालाई प्रभावकारी रुपमा कार्यान्वयन गर्नुहुनेछ । सार्वजनिक सेवामा सूचना प्रविधिको उच्चतम उपयोग गर्दै सहज, सरल, सुलभ र अनलाईन मार्फत सेवा प्रदान गर्नुहुनेछ। संभव भए सम्मका सरकारी सेवाहरुलाई विद्युतीय माध्यमबाट प्रदान गर्नुहुनेछ । विद्युतीय सुशासनलाई प्रवर्द्धन गरी विद्युतीय अभिलेख र सूचनाको सुरक्षा र गुणस्तरमा विशेष ध्यान पुर्याउनु हुनेछ ।
  • संवैधानिक मार्गदर्शन अनुसार संघ र स्थनीयतहबीच समन्वय, सहकार्य र सह-अस्तित्व कायम गर्दै अन्तरसम्बन्धलाई थप सुदृढ गर्नुहुनेछ । महत्वपूर्ण र रणनीतिक महत्वका विषयमा मुख्यमन्त्री तथा मन्त्रीपरिषद्को कार्यालयलाई निरन्तर जानकारी गराउनुहुनेछ ।
  • आफ्नो काम सँग सम्बन्धित प्रदेशवासीका गुनासाहरुलाई समयमै सम्बोधन गर्नुहुनेछ । नवप्रवर्तन सिर्जनशील कार्यहरुलाई प्राथमिकता दिनुहुनेछ ।अध्ययन र अनुसन्धानका आधारमा शासकीय सुधारका कार्य अगाडि बढाउनुहुनेछ । निरन्तर सुधार भित्र गुणात्मक सुधार गर्नुहुनेछ ।
  • सरकारी, निजी, सहकारी र गैर सरकारी क्षेत्रसँग समन्वय, सहकार्य र साझेदारी गर्नुहुनेछ । सार्वजनिक-निजी साझेदारीलाई प्रोत्साहन र प्रवर्द्धन गर्नुहुनेछ ।
  • लुम्बिनी प्रदेशलाई समृद्ध, समुन्नत, गतिशील र न्यायपूर्ण बनाउँदै हरेक क्षेत्रमा उत्कृष्ट, उदाहरणीय र नमूना प्रदेश बनाउन हरतरहले सहयोग गर्नुहुनेछ । प्रदेशवासीको हित, कल्याण, सुख, समृद्धि र असल जीवन प्रणालीको विकासका लागि यहाँहरुको अमूल्य योगदान रहनेछ ।
  • प्रदेश सरकार नयाँ सोंच, शैली र संस्कारकासाथ निष्ठापूर्वक आफ्नो दायित्व, जिम्मेवारी र अभिभारा पूरा गर्न कटिबद्ध, प्रतिबद्ध र दृढसंकल्पित रहेको आभास आम प्रदेशवासीलाई दिनुहुनेछ ।
  • प्रदेशवासीका समृद्धि र विकासका आकांक्षा पूरा गर्न र प्रदेशवासी जनताले सुम्पेको विश्वास र भरोसा लाई सदैव शिरोपर गरी प्रदेशका आर्थिक सामाजिक रुपान्तरणका साझा लक्ष्यहरु हासिल गर्न एकतावद्ध भएर सामूहिक भावना (Team Spirit) का साथ अघि बढ्नु हुनेछ ।
  • मन्त्रिपरिषद्का माननीय सदस्यहरु र सचिवहरुको कार्य क्षमता र दक्षताले प्रदेशको कार्य सम्पादनस्तर गुणस्तरीय र परिणाममुखी बनाउन यहाँहरु सबैको सक्रिय र सकरात्मक सहयोग प्राप्त हुनेछ । यहाँहरुको कुशल र सवल नेतृत्वले लोकतन्त्रको सुदृढीकरण, सुशासन, समृद्धि र विकासको यात्रामा सफलता मिल्नेमा म पूर्ण विश्वस्त छु ।
  •                                                                                                                                                                                                       -धन्यवाद